window.__reverb = {}; window.__reverb.__reverbLoadedPromise = new Promise((resolve, reject) => { window.__reverb.__resolveReverbLoaded = resolve; window.__reverb.__rejectReverbLoaded = reject; }); window.__reverb.__reverbTimeout = setTimeout(() => { window.__reverb.__rejectReverbLoaded(); }, 5000);

NA EME UGBU A, Ịran ekwuola na ha ga-awakpo ogige ndịagha Amerịka, UK na Fransị ma ọ bụrụ na ha kwado Izrel

Nchịkọta akụkọ ndị kachasị mkpa mere na mbaụwa n'ọnwa Juun 2025.

Mkpuchi Na Eme Ozugbo

Uzoamaka Ewuzie, Ikechukwu Kalu, Michael Ngene, Chinonso Ugorji, Michael Ilediagu, Adline Okere, Marvelous Obomanu

elekere 2 gara agaNdị ọkwọ ụgbọala abụọ mebiri mbọ izu ohi na ịtọrọ mmadụ n'Abịa steeti
Ebe foto si, Getty Images
Nkọwa foto, Ndịagha chọpụtara na ndị ahụ a na-enyo enyo bu egbe na ngwaagha dị iche iche n’ime ụgbọala ahụ
Ndị ọkwọ ụgbọala abụọ mebiri mbọ ndị a na-enyo enyo na ha bụ ndị omempụ gbara iji ezu ndị njem ohi ma tọrọkwa ụfọdụ n’ime ha n’okporoụzọ si Aba gawa Ụmụahịa n’Abịa steeti.
Akụkọ ruru ụlọ mgbasa ozi BBC ntị kwuru na òtù ndị a na-enyo enyo na ha bụ ndị omempụ banyere n’ụgbọala Kosta bọs si Aba na-aga isi obodo Ụmụahịa oge ndị njem abụọ malitere ịgwa onye ọkwọ ụgbọala ka ọ kwụsị ha na mpaghara ebe a ma ama dịka ebe ndị omekome na-akpa nkpankpa na steeti ahụ.
Onye ọkwọ ụgbọala ahụ jụrụ ịkwụsị ebe ahụ nke mere ka ndị omempụ ahụ malitekwa iyi ya egwu ma kwuo na ha “ga-agbapụ isi ya" ma ọ bụrụ na ọ kwụsịghị ebe ahụ, dịka etu onyeisi otu Cooperative Transport Union nke Abịa Steeti Chukwuma Azode, siri kọwaa.
Azode kwuru na onye ọkwọ ụgbọala ahụ nwere obi isi ike ma buru ụgbọala ahụ gbaa oke ọsọ, tupu o rute ebe ndịagha Naịjirịa na-eme nnyocha n’Isialangwa nwere kwụsị ma kpọọ ndịagha oku enyemaka.
“Nke a mere ka ndịagha malite nnyocha tupu ha were chọpụta na ndị ahụ a na-enyo enyo bu egbe na ngwaagha dị iche iche n’ime ụgbọala ahụ,” Azode kwuru.
O kwuru na onye ọkwọ ụgbọala ahụ gwara onye ọkwọ ụgbọala na-eso ya n’azụ ka ọ ghara ịkwụsị ebe ọ bụla kama ka ọ gbara bịa ebe ndịagha na-eme nnoycha n’Isialangwa.
“Mgbe onye ọkwọ ụgbọala nke abụọ rutere ebe ahụ, ndịagha nnyochara ụgbọala ya ma chọpụtakwa na ndị ọzọ bukwa egbe na ngwaagha ndị ọzọ n’ime ụgbọala ahụ.”
O kwuru na nke a mere ka ndịagha nwụchie mmadụ isi a na-enyo enyo dịka ndị ojiegbe emempụ.
Ndị ọchịchị kwuru na ndị ahụ a nwụchiri nọ n'aka ndịagha ugbua dịka nnyocha na-aga n'ihu iji mata ọrụ ha niile.
elekere 3 gara agaMmadụ 11 anwụọla ebe a na-achọ ndị ọzọ achọ n’ide mmiri mere na San Antonio
Ebe foto si, KENS 5 - CBS
Nkọwa foto, A na-atụ anya na ndị nwụrụ nwereike ịrị dịka mbọ ịchọta ndị o metụtara na-aga n’ihu. E kwuru na nke a nwereike inwe ọtụtụ abalị.
Ihe ruru mmadụ ka akụkọ kwuru na ha anwụọla n’ide mmiri kpara mkpamkpa ma San Antonio mba Amerịka. Ndị ntaakụkọ kwuru na a na-achọ ọtụtụ ndị ọzọ achọ.
Nnukwu idemmiri ahụ mere ụbọchị Wenezde na Tọzde wakporo ọtụtụ ụgbọala ebe ndị ọrụ ụlọọrụ na-agbanyụ ọkụ na San Antonio kwuru na ha na-achọ mmadụ anọ e kwuru na idemmiri ahụ buuru.
A na-atụ anya na ndị nwụrụ nwereike ịrị dịka mbọ ịchọta ndị o metụtara na-aga n’ihu. E kwuru na nke a nwereike inwe ọtụtụ abalị.
Ụlọọrụ ahụ na-arịọ enyemaka ndị ụlọọrụ gbatagbata steeti ndị ọzọ ka ha nyere ha aka ugbua.
elekere 3 gara agaỤlọọrụ NiMet ekwuola na-aga enwe oke mmiri ozuzo ụbọchị atọ na égbè eluigwe malite na Satọde
Ebe foto si, Getty Images
Nkọwa foto, A na-atụ anya oke mmiri ozuzo imalite n’ụtụtụ Satọde na steeti dị na ndịda Naịjirịa
Ụlọọrụ na-ahụ maka ihu igwe na Naịjirịa NiMet ekwuola na-aga enwe oke mmiri ozuzo ụbọchị atọ na égbè eluigwe nke ga-amalite n’ụtụtụ ụbọchị Satọde 14 Juun 2025 na Naịjirịa niile.
Ha kwuru na a ga-enwe égbè eluigwe na mpaghara Kebbi, Taraba, Zamfara, Borno, Kaduna, Sokoto, Gombe, na Bauchi n’oge mgbede Satọde, dịka ụlọ mgbasa ozi Channelstv siri kwuo.
Ha kwukwara na a ga-enwe égbè eluigwe n’ụtụtụ na mpaghara etiti ugwu gụnyere Benue, Plateau, Niger, Nasarawa steeti na isi obodo Abụja.
Nke a ga-erutekwa steeti ndị gụnyere Benue, Kwara, Kogi na Plateau steeti
Ụlọọrụ ahụ kwuru na a na-atụ anya ikuku urukpuru na ohere nke mmiri ozuzo imalite n’ụtụtụ Satọde na steeti dị na ndịda Naịjirịa gụnyere Enugwu, Ebonyi, Kross Riva, Legọs, Akwa Ibom, Rivas na Bayelsa.
elekere 4 gara agaỊran ekwuola na ha ga-awakpo ogige ndịagha Amerịka, UK na Fransị ma ọ bụrụ na ha kwado Izrel
Ebe foto si, Reuters
Nkọwa foto, Ịran kwuru na ha ga-awakpo ụgbọmmiri mba atọ ahụ nọ na mpaghara ahụ
Dịka esemokwu dị n’etiti Ịran na Izrel na-akawanyenjọ, Ịran adọọla mba Amerịka, UK na Fransị aka na ntị ka ha wezuga onwe ha n’ebe okwu dị n’etiti mba abụọ ahụ dị.
Ịran gara n’ihu kwuo na ha ga-awakpo ogige ndịagha mba atọ ahụ nwere na mpaghara Etiti Ọwụwa Anyanwụ mba ụwa ma ọ bụrụ na kwado mba Izrel n’agha ahụ na-aga n’ihu n’etiti mba abụọ ahụ.
Ịran kwuru na ha ga-awakpo ụgbọmmiri mba atọ ahụ nọ na mpaghara ahụ, dịka ụlọ mgbasa ozi mba ahụ siri kwuo.
Akụkọ kwuru na obi ọchịchị mba UK bụ Downing Street ekwubeghị ihe ọ bụla mana onye ntaakụkọ BBC kọwaara na mba UK etinyebeghị aka n’ọrụ ndịagha ọ bụla nke gụnyere ichekwa mba Izrel.
Cheta na Izrel na Ịran siri n’elu kwakọrịta onwe ha mgbọ n'abalị.
Dịka Izrel tụrụ ogbunigwe n’akụrụngwa Ịran ji emepụta ngwaagha Ịran gara n’ihu tụọ ogbunigwe ‘ballistic missile’ na mpaghara Izrel ụfọdụ n’abalị nke mere e jiri nye ndị bi na mba ahụ iwu ka ha gbaa ọsọ ndụ.
elekere 9 gara agaA nwụchiela onye uweojii ọkwa ya dị elu na Kenya maka ọnwụ nwaokorọbịa
Ebe foto si, AFP via Getty
E jichiela Onyeisi ụlọọrụ ndị uweojii dị n’isi obodo Kenya bụ Naịrobi n’ihi nwaokoroọbịa na-ebipụta akụkọ n’ịntaneetị e gburu oge ọ nọ n’aka ndị uweojii.
Ọ bụ ndị na-eme nnyocha kwụụrụ onwe ha kwupụtara nke a.
A nwụchikwara onye uweojii jị ọkwa Officer Commanding Station bụ Samson Talam, onye uweojii ọzọ bụ PC James Mukhwan na onye injinịa e boro ebubo ịtọpụ onyonyoo CCTV dị n’ụlọọrụ ndị uweojii ahụ.
Ọnwụ Albert Ojwang kpaliri ngagharịiwe oge ndị dọkịta kọwara ozi ndị uweojii wepụtara gbasara ọnwụ nwaamadị ahụ dịka okwu asị.
Ndị uweojii kwuru na Ojwang jiri aka gbuo onwe ya oge ọ kụrụ isi n’ahụ aja n’ime ụlọnga, mana ndị dọkịta kọwara na ihe nwereike ibute ọnwụ nwaamadị ahụ bụ omume ike.
Opekatampe mmadụ 23 bụ ndị a gbaraala ajụjụ, ebe mmadụ ise ka e wepụrụ n’ọrụ dịka nnyocha kwụụrụ onwe ya na-aga n’ihu gbasara ọnwụ Ojwang.
elekere 9 gara agaIzrel na Ịran akwakọrịtala onwe ha mgbọ n’ime abalị
Agha kpụ ọkụ n'ọnụ adaala n’etiti Izrel na Ịran, dịka mba abụọ ahụ siri n’elu kwakọrịta onwe ha mgbọ n'abalị.
Ọnọdụ a sochiri ogbunigwe Izrel tụrụ n’akụrụngwa Ịran ji emepụta ngwaagha ọgwụrụmba n’ụbọchị Fraịde.
Ogbunigwe ‘ballistic missile’ tụtara mpaghara Izrel ụfọdụ n’abalị dịkwa ka e nyere ndị bi na mba ahụ iwu ka ha gbaa ọsọ ndụ.
E gburu opekatampe mmadụ abụọ, ebe ọtụtụ ndị ọzọ nwetara mmerụahụ.
Onye ntaakụkọ BBC mere ka anyị mata na a nụrụ ihe tiwara na Jerusalem, dịka anwụrụ ojii gosiri na mpaghara Tel Aiv.
Na mbụ, ndị nchekwa Izrel bụ IDF kwuru na ha ji ogbunigwe gbuo ndị ọchịagha mba Ịran atọ, mana Tehran kwuru na e gbukwara ndị ọkachamara sayensị isii.
elekere 9 gara agaOnye ọma, ị saala chi eee, Ngwụcha izuụka ọma nụ!
Chinonso Ugorji ji obiụtọ anabata gị n'ọgbakọ BBC News Igbo n'ụbọchị taa bụ Satọde Eke 14 Juun 2025.
Gaa n'ihu nọnyere anyị dịka anyị na-ewetere gị akụkọ niile na-akpọtụ na mpaghara ụwa dị iche iche.
Uzoamaka Ewuzie na Michael Ngene ga-anọkwa ebe a n'oge ehihie.
Daalụ!
13 Juun 2025Iran atụọla ogbunigwe mmegwara megide Izrel
Ebe foto si, Reuters
Nkọwa foto, Onye ndú Iran kachasịnụ ṅụrụ iyi na ya ‘ga-emesi Izrel ike’ n’imegwara
Ihe ruru mmadụ iri anọ (40) ka a na-eleta n’ụlọọgwụ ugbua ebe mmadụ abụọ nọ n’ọnọdụ gbata gbata dịka Iran tụrụ ogbunigwe na mwakpo iji megwara mba Izrel maka mwakpo Izrel mere ha.
Iran malitere ịtụ ogbunigwe n’Izrel dịka Onye ndú ha kachasịnụ ṅụrụ iyi na ya ‘ga-emesi ha ike’ n’imegwara maka mwakpo ndị Izrel mere Iran n’abalị.
Iran tụrụ ogbunigwe na-erughị 100 n'ime ogbunigwe abụọ ha gbara n’Izrel, ọnụ na-ekwuchitere ndịagha Izrel Avichay Adraee kwuru.
Onye ntaakụkọ BBC kwuru na ya nụrụ ihe tiwara n’obodo Jerusalem dịka a hụrụ anwụrụ ọkụ ojii ka ọ na-arị elu n’ihu igwe Tel Aviv.
Cheta na ụlọọrụ IDF kwuru na a wakporo ogige ndịagha ma gbuo onyeisi Revolutionary Guard bụ Hossein Salami, ndị isi ndịagha ọzọ nakwa ndị sayensị mmadụ isii.
N’aka nke ọzọ, Praịm minista Izrel Benjamin Netanyahu na-agba ndị Iran ume ka ha dị njikere.
13 Juun 2025A chọtala igbe ojii n'ebe ụgbọelu kpọkara n’Indịa – Minista
Ebe foto si, Getty Images
Nkọwa foto, A matabeghị mmadụ ole ụgbọelu ahụ gburu oge ọ kpọkara n’ụlọ obibi
Minista na-ahụ maka ụgbọelu n’Indịa kwuru na a chọtala igbe ojii n’ebe ụgbọelu Air Indịa kpọkara n’ Ahmedabad n’Indịa.
Cheta na ọ bụ naanị otu onye n’ime ndị njem 242 nọ n’ụgbọelu ahụ si Indịa na-aga Lọndọn pụtara na ndụ oge ụgbọelu ahụ kpọkara n’ụbọchị Tọzde 12 Juun 2025.
Ọzọ bụ na a matabeghị mmadụ ole ụgbọelu ahụ gburu oge ọ kpọkara n’ụlọ obibi ndị mmadụ n’ime obere oge ọ fepụrụ.
Nwamaala Briten ahụ naanị ya pụtara na ya bụ ihe ọdachi aha ya bụ Vishwashkumar Ramesh na-enweta onwe ya ugbua n’ụlọọgwụ, dịka nwanne ya nwoke kwuru na “ọ maghị etu o siri pụta na ndụ”.
13 Juun 2025Anyị achọghị Onyeisiala Zambịa n’akwamozu nna anyị - Ezinaụlọ Edgar Lungu
Ebe foto si, Photothek/Getty Images
Nkọwa foto, Edgar Lungu bụbu Onyeisiala Zambịa nwụrụ na Saụt Afrịka dịka ọ gbara afọ 68
Ezinaụlọ Edgar Lungu bụbu onyeisiala mba Zambịa ekwuola na ha achọghị ka Onyeisiala Hakainde Hichilema bịa akwamozu ya.
Cheta na Edgar Lungu nwụrụ n’izuụka gara aga n’ụlọọgwụ dị na Saụt Afrịka dịka ọ gbara afọ 68.
Ọkwa a ezinaụlọ Lungu mara na-abịa dịka a na-enwe esemokwu banyere atụmatụ akwamozu Edgar Lungu chịrị Zambịa malite na 26 Jenụwarị 2015 ruo 24 Ọgọst 2021.
Gọọmenti kwuru na ha chọrọ ibulata ozu Edgar Lungu ụbọchị Wenezde 11 Juun, 2025 mana ezinaụlọ ya na pati gbochiri ha ime nke n’ihi esemokwu dị n’etiti ha banyere nhazi Usoro akwamozu ya.
Tupu ya anwụọ, Lungu na Onyeisiala Hichilema esighị out ụzọ n’ihi ndọrọ ndọrọ ọchịchị. Hichilema meriri Lungu na ntuliaka ọkwa onyeisiala n’afọ 2021.
Ọkaiwu eianụlọ Lungu bụ Makebi Zulu gwara BBC na ezinaụlọ Lungu nabatara na gọọmenti Zambịa chọrọ ịkwanyere nna ha Edgar Lungu ugwu ikpeazụ n’ụzọ pụrụiche mana ha chọrọ ikwu onye ga-abụ ụkọchukwu ga-akara nna ha ụka ọnwụ.
N’aka nke ọzọ, pati Edgar Lungu bụ Patriotic Front (PF), boro gọọmenti Zambịa ebubo ma kwuo na goọmenti gbochiri Edgar Lungu ịpụ na Zambịa n’agbanyeghị na ọ nọ n’ọrịa..
N’okwu PF, ‘Ọ bụ maka mgbochi ahụ mere anyị ji enweghịike ibuga ya ụlọọgwọ oge ọnọdụ ahụike ya malitere ịkawanye njọ, ọ bụrụ na ọ gara ụlọọgwụ n’oge, Edgar Lungu akaghị ịnwụ’.
Ka ọ dị ugbua, gọọmenti Zambịa gọnarịrị ebubo ahụ.
13 Juun 2025Etu ụmụnne siri kpọchie nwanne ha si Amerịka lọghachi n’ime ụlọ n’Anambra steeti
Ebe foto si, Screenshot
Akụkọ ihe mere n’Enugwu-Ukwu dị n’Anambra steeti na-agba anyammiri ma bụrụ ihe mgbagwojuanya.
Otu nwoke aha ya bụ Peter Mokwuah ebiela na mba Amerịka ihe karịrị afọ iri abụọ na ise tupu ọ laa ezumike nka.
Peter gwara ụmụ ya ka ya laa obodo ya bụ Enugwu Ukwu ebe ọ rụrụ nnukwu ụlọ wee nọọ ọnọdụ ezumike nka ya.
Nwa ya nwaanyị bụ Ifunanya Mokwuah kọwara na nna ya lara obodo ya, mana ha na-akparịta n’ekwentị kwa mgbe kwa mgbe.
“Kemgbe nna m latara Naijiria anyị na ya na-ekwu n’ekwentị mgbe niile. Ọ gbazịrị m gharịị na kemgbe otu afọ, ọ bụzị nwanne nna m na nwunye ya na-azazi oku ekwentị nna m”.
“Oge ọ bụla m jụrụ ha gbasara nna m, ha asị na ọ pụrụ apụ maọbụ na ọ na-ehi ụra,” ka Ifunanya Mokwuah kọọrọ anyị.
Ọ gara n’ihụ kọwaa na akụkọ ahụ ejughị ya afọ n’ihi na kemgbe otu afọ, ya na nna ya ekwubeghị.
Omume ọjọọ niile ụmụnne nna ya na ndị nwunye ha na-emeso ya ma ọ kpọọ ha mere o jiri chee na nna ya nwereike ịnọ na nsogbu.
Ifunaya siri ọnwụ si obodo New York dị na mba Amerịka lọghachi Naịjirịa, ebe ọ hụrụ na a kpọchiri nna ya n’otu ime ụlọ ma dobe ya agụụ kemgbe ọtụtụ ọnwa, nke mere o ji nọrọ ọnọdụ ọdị ndụ ọnwụ ka mma.
Site n’enyemaka ndị obodo, Ifunanya eburula nna ya gaa n’ụlọọgwụ ebe a na-enye ya ọgwụgwọ ugbua.
Aka ndị ụweojii akparala ụmụnne nwoke ahụ iji mee ka ha zara ọnụ ha.
13 Juun 2025Onyeisiala Trump adọọla Ịran aka na nti banyere mwakpo ọzọ mba Izrel na-akwado
Ebe foto si, Getty Images
Nkọwa foto, Ịran boro Amerịka ebubo ịkwado mwakpo ahụ Izrel wakporo ha.
Ndịagha mba Izrel ekwuola na ha gbochiri ụfọdụ n’ime ogbunigwe dronu ruru otu narị mba Ịran tụrụ ha, nke a na-abịa dịka mba Izrel wakporo mba Ịran ugboro ugboro n’abalị Tọzde 12 Juun, 2025.
Ụlọọrụ IDF kwuru na ha wakporo ogige ndịagha ma kwuo na ha gburu onyeisi Revolutionary Guard bụ Hossein Salami nakwa ndị ndị isi ndịagha ọzọ.
Ịran kwuru na e gburu ndị ọrụ sayensị isii nakwa ọtụtụ ndị ọzọ gụnyere ụmụaka.
Onyeisiala Trump gwara Ịran ka ha na Izrel nwee nkwekọrịta banyere ngwa agha nuklịa ma dọọ aka na ntị banyere mwakpo ọzọ nwereike isi Izrel – mana Ịran boro Amerịka ebubo ịkwado mwakpo ahụ Izrel wakporo ha.
13 Juun 2025Gọọmenti Naịjirịa agbagharala Ken Saro-Wiwa afọ 30 e gbuchara ya
Ebe foto si, Tim Lambon / Greenpeace
Nkọwa foto, A mara Sawo-Wiwa na mmadụ asatọ ndị ọzọ ikpe ọnwụ ma gbuo ya n’afọ 1995 n’oge ọchịchị ndịagha
Onyeisiala Naịjirịa agbagharala onye na-akwalite mgbanwe ọchịchị nwụrụ anwụ Ken Saro-Wiwa, e gburu afọ iri atọ nke ọnwụ ya kpalitere oke iwe zuru ụwa ọnụ.
A maara Sawo-Wiwa na mmadụ asatọ ndị ọzọ ikpe ọnwụ ma gbuo ya n’afọ 1995 n’oge ọchịchị ndịagha.
Ụfọdụ ndị na-akwalite mgbanwe ọchịchị nabatara ngbaghaara ahụ ma kwuo na o zughị igbanwe ihe ọ bụla.
Cheta na ọtụtụ kwenyere na a na-ata ndị ahụ na-akwalite mgbanwe ọchịchị ahụhụ maka ikwado ngagharịiwe megide ọrụ nke ụlọọrụ na amịpụta mmanụ ụgbọala, ọkachasị Shell, n’ala Ogoni nke Naịjirịa.
Ụlọọrụ Shell gọnarịrị na aka ha adịghị n’igbu nwaamadị ahụ na ndị otu ya.
Ụmụ nwoke itoolu ahụ sonyekwara na ndị Onyeisiala Bola Tinubu nyere ugwu mba n’ụbọchị emume ncheta ọchịchị onyekwuoucheya gụnyere Saro-Wiwa, Barinem Kiobel, John Kpuinen, Baribor Bera, Felix Nuate, Paul Levula, Saturday Dobee, Nordu Eawo na Daniel Gbokoo.
13 Juun 2025Izrel awakpola Iran ma gbuo ndị isi agha na ndị sayensị
Ebe foto si, Getty Images
Nkọwa foto, Trump dọrọ Iran aka na ntị banyere mwakpo 'obi ọjọọ' nke mba Izrel
Mba Izrel awakpola nuklia saịtị mba Iran ma gbuo ndị isi agha na ndị sayensị na mba ahụ.
Nke a na-eme dịka Onyeisiala mba Amerịka Donald Trump dọrọ Iran aka na ntị banyere mwakpo 'obi ọjọọ' nke mba Izrel.
Onyeisiala Trump gwara Iran ka ha nwee nkwekọrịta maka usoro nuklia ha dịka Iran na-ebo Amerịka ebubo ikwado Izrel nke Amerịka gọnarịrị.
Ndịagha Izrel kwuru na Iran gbara ihe ruru otu narị duronu na mpaghara nke ọtụtụ n'ime ha ka a gbaturu, mgbe Izrel tụrụ ogbunigwe n’Iran n'abalị.
Ndị IDF na-ekwu na o mere mwakpo na saịtị nuklia ma kwuo na e gburu onyeisi ndị nchekwa Revolutionary Guard Hossein Salami na ndị isi ndị ọzọ.
Iran kwuru na ndị sayensị mmadụ isiii nwụrụ dịka ụlọ mgbasa ozi mba ahụ kọrọ na ndị nkịtị na ụmụaka so na ndị nwụrụ anwụ mana BBC enoychabeghị nke a.
Cheta na Izrel na Iran wakporo onwe ha n’afọ gara aga n’Eprel na Ọktoba.
13 Juun 2025Praịm Minista Indịa agaruola ebe ụgbọelu kpọkara n’ụbọchị Tọzde
Praịm Minista Indịa bụ Narendra Modi agaruola ebe ahụ ụgbọelu ‘Air India’ kpọkara dị na mpaghara Ahmedabad ma letakwa ndị merụrụ ahụ nọ n’ụlọọgwụ.
Naanị otu onye njem n’ime ndị njem 242 nọ n’ụgbọelu ahụ si Indịa na-aga Lọndọn pụtara na ndụ oge ụgbọelu ahụ kpọkara n’ụbọchị Tọzde 12 Juun 2025.
A matabeghị mmadụ ole ụgbọelu ahụ gburu oge ọ kpọkara n’ụlọ obibi ndị mmadụ n’ime obere oge ọ fepụrụ.
Nwamaala Briten ahụ naanị ya pụtara na ya bụ ihe ọdachi aha ya bụ Vishwashkumar Ramesh na-enweta onwe ya ugbua n’ụlọọgwụ, dịka nwanne ya nwoke kwuru na “ọ maghị etu o siri pụta na ndụ”.
Ụlọọrụ ụgbọelu Air India kwuru na ndị nọ n’ime ụgbọelu ahụ gụnyere ụmụafọ Indịa 169, ụmụafọ Briten 53, ndị Pọtugal asaa na otu onye Kanada.
Ezinaụlọ ndị nwụrụ anwụ amalitela igosi njirimara DNA ha iji nweeike chọta ozu ndị nke ha nwụrụ anwụ.
13 Juun 2025Igbo nwe mmadụ, ụnụ abọọla chi, Ọfọ anyị taa bụ ndụ mmiri, ndụ azụ.
Abọ ekele ka anyị na-ebutere gị maka isonyere anyị taa n'ọgbakọ BBC News Igbo.
Anyị adịla njikere iwetere gị akụkọ niile na-akpọtụ n'ụwa taa.
Biko gaa n'ihu nọnyere anyị.
12 Juun 2025Pati na-achị Burundi emeriela oche niile na ntuliaka ndị omeiwu
Ebe foto si, AFP via Getty Images
Nkọwa foto, Ndị ndọrọndọrọ ọchịchị ndị ọzọ na-ebo ebubo igbu ọchịchị onyekwuoucheya na mba ahụ dị n’etiti Afrịka.
Otu ndị ndọrọ ndọrọ na-achị Burundi ugbua emeriela oche otu narị nke ụlọomeiwu na ntuliaka e mere na mba ahụ.
Mana ndị ndọrọndọrọ ọchịchị ndị ọzọ na-ebo ebubo igbu ọchịchị onyekwuoucheya na mba ahụ dị n’etiti Afrịka.
N'iwepụta ihe nsonaazụ nke ntuliaka e mere na mba ahụ n’izu gara aga, onyeisi ngalaba ntuliaka Prosper Ntahorwamiye kwuru na ndị otu CNDD-FDD nwetara ihe karịrị 96% vootu na mpaghara niile.
Ntuliaka ahụ hụrụ naanị "ụfọdụ obere ihe mmebi iwu", ka ọ gbakwụnyere.
N’aka nke ọzọ, pati mmegide bụ Uprona bụ ndị nwetere akara nke abụọ dịka ha nwere pacentị ji obere ihe karịa 1% vootu.
Ha kwuru na nrụrụaka dị na ntuliaka ahụ dịka onyeisi otu pati ahụ Olivier Nkurunziza gwara ụlọ mgbasa ozi AFP na ndị Burundi egbuola ọchịchị onyekwuoucheya.
12 Juun 2025Otu onye mba Briten ji ndụ ya pụta n'ụgbọelu ahụ kpọkara n'Indịa
Ebe foto si, Getty Images
Nkọwa foto, Ụgbọelu ahụ kpọkara n’ogige obibi ndị dọkịnta ahụike
Akụkọ kwuru na otu onye mba Briten aha ya bụ Vishwashkumar Ramesh ji ndụ ya pụta n’ụgbọelu ahụ kpọkara n’Indịa.
Ramesh gosiri foto akwụkwọ njem ya ma kwuo na ngwa ngwa ụgbọelu ahụ fepụrụ, ha nụrụ nnukwu mkpọtụ.
BBC na otu onye ezinaụlọ Ramesh bi na Leicester enweela mkparịtaụka dịka o kwuru na ha na-atụanya ịnweta ozi banyere otu onye ezinaụlọ ha ọzọ nọ n’ụgbọelu ahụ.
Anyị wetara gị akụkọ banyere ụgbọelu ahụ bu mmadụ 242 na-eme nje na ndị ọrụ kpọkara n’Ahmedabad, Indịa.
Ndị uweojii kwuru na ha ahụla ozu mmadụ 204 mana ha kwuru na o doghị anya ka ha niile abụ ndị nọ n’ụgbọelu ahụ n’ihi na ọ kpọkara n’ogige obibi ndị mmadụ.
Ụlọọrụ Air India kwuru na ụgbọelu ahụ bu ndị Indịa 169, ndị Briten 53, mmadụ 7 si mba Pọtụgal ebe otu onye bụ onye mba Kanada.
Ụgbọelu ahụ kpọkara n’ogige obibi ndị dọkịnta ahụike.
Aha onyonyo, Ụgbọelu ahụ na-aga Lọndọn oge ọ kpọkara
12 Juun 2025Ụlọomeiwu ekpebiela ka Onyeisiala na-agwa ọgbakọ ndị omeiwu okwu kwa ụbọchị 'Democracy Day'
Ebe foto si, State House NG
Nkọwa foto, Ndị omeiwu nwere mkpebie a n’ọgbakọ ụlọomeiwu abụọ ahụ nwere ụbọchị Tọzde 12 Juun 2025
Ndị omeiwu ekpebiela na Juun 12 afọ ọbụla dịka ụbọchị Onyeisiala Naịjirịa ga na-agwa ọgbakọ ndị omeiwu ukwu na nke nta okwu.
Ndị omeiwu nwere mkpebie a n’ọgbakọ ụlọomeiwu abụọ ahụ nwere ụbọchị Tọzde 12 Juun 2025 iji mee emume ncheta ọchịchị onyekwuoucheya n’isi obodo Abụja, bụ ebe onyeisiala Bola Tinubu gwara ndị omeiwu okwu.
Onyeisi ndị omeiwu Sinetị Godswill Akpabio kwupụtara mkpebi ahụ dịka onyeisi ụlọomeiwu nta, Tajudeen Abbas welitere nkwupụta n’ọgbakọ ahụ.
Akpabio kwuru na ndị omeiwu nwere mkpebi ahụ n’ihu onyeisiala Tinubu.
12 Juun 2025Chaịna ejikerela iwepụ tarifu na mbubata niile si Afrịka
Ebe foto si, AFP via Getty Images
Nkọwa foto, Chaịna bụ mba nke kachasị ha na mpaghara Afrịka na-azụkọ ahịa n'ụwa niile
Mba Chaịna ekwuola na ọ dị njikere iwepụ tarifu na mbubata niile si na mba iri ise na atọ nọ n’Afrịka bụ ndị ha na ya nwere mmekọrịta mba na mba.
Ha kwupụtara nke a na-ọgbakọ mba Chaịna na Afrịka nwere dịka mba Amerịka tinyere tarifu dị elu na mbubata si na mba ndị nọ na mpaghara Afrịka gawa Amerịka.
Cheta na Chaịna bụ mba kachasị ha na mpaghara Afrịka na-azụkọ ahịa - ọnọdụ o ji kemgbe afọ iri na ise – dịka mba dị n’Afrịka bugara ngwaahịa ruru ọnụ ego ijeri dọla otu narị na iri asaa ($170) na Chaịna n’afọ 2023.
Atụmatụ tarifu efu a, mgbe e tinyere ya, ga-esonye na nkwekọrịta e mere n'afọ gara aga maka Chaịna iwepụ tarifu na ngwaahịa sitere na mba 33 dị n'Afrịka nke gụnyere Saụt Afrịka, Naịjirịa na ndị ọzọ.